被指老過譚詠麟！李克勤一黐後生仔女立即回春
歌手李克勤近年被指外形變得好快，早前同譚詠麟（阿倫）踢波，有網民話佢曬到好黑，個樣都好似老過阿倫。不過克勤近日主理無綫節目《聲夢傳奇》，同一班後生仔女親近得多，個人真系Young咗！
佢喺社交網曬出打Golf嘅相，唔少網民都話佢呢身打扮後生咗唔少，佢留言話：“天色已漸沉...”好多人即玩接龍，喺留言區寫上《深深深》嘅歌詞添！而克勤之後又Post同一班《聲夢》參賽者影嘅合照，大家都話見到個畫面，克勤青春返曬嚟！
古天樂信有外星人：見到我一定舉機拍下
影帝古天樂百足咁多爪，又拍戲又做老闆，系圈中超級大忙人，好多“古粉”都問過佢點分配時間。雖然忙，不過都冇影響佢對呢個世界，甚至整個宇宙嘅好奇，佢就喺社交網大談一個大家都好想知嘅話題，到底有冇外星人，佢留言：“最近留意到在南美國家玻利維亞出現外星人事件，據報道有羣眾同時目擊UFO及有外星人出現，可惜人們都陷入驚慌之中，結果就沒有人成功拍下照片，否則會成為近代一次很重要的目擊事件了。”
咁如果系古仔親身目擊外星人，佢會點做？佢就話：“如果你問我是否相信這事，我是會比較傾向相信的，也許大家覺得在沒有照片的情況下，對可信程度存有懷疑，不過在極度震驚之下，沒有舉起手機拍照也是很正常，不過，如果有一天外星人真的出現在我眼前，我相信除非感到危險，否則我無論如何也拍下照片的！”唔少網民都話佢求知慾極強，仲要非常大膽，有人提議古仔組團去美國Area 51（傳有外星人出沒的地方），就一定報名一齊去！
袁偉豪高級餐廳擦生蠔做“超級人生勝利組”
無綫小生袁偉豪日前40歲生日，老婆張寶兒連日來都同佢大肆慶祝，真系食生日飯都食到肥。不過唔好畀佢停，今次輪到王賢志同伴侶Kevin為佢慶生，王賢志仲喺社交網放上短片，紀錄呢個開心時刻，張寶兒仲轉載埋添！只見片中佢哋喺一間高級餐廳舉杯慶祝，又大擦海鮮同生蠔，幾咁寫意！之前袁偉豪喺社交網發表示過“四十而不惑”言論，又話自己唔會因為成為人生勝利組而自滿，引起網民熱議，但連日來見佢生日派對一個接一個，有口痕網民就話佢其實系“超級人生勝利組”！
阿嬌懶理脹爆負評！拍片賣萌V面返番嚟
藝人鍾欣潼（阿嬌）早前上內地內地綜藝節目《怦然心動20歲》時，被指身形發福，足足大咗幾個碼，引起網民熱討。之前佢話身形暴脹有原因，系因為有新電影開拍，類近多年前嘅韓國電影《醜女大翻身》，由於內容屬商業秘密，所以有關嘅參與者均未能向外界透露細節。
而阿嬌似乎未有受外界評論影響，佢日前喺社交網上載一段短片，並留言：“#暖心告白季 #做個快樂的女孩 #動感光波！”片中用美顏濾鏡，令佢回覆尖面，又對着鏡頭大擺“港女十式”甫士，全程甜笑，心情大靚！唔少網民都留言話健康快樂就好，無論點都支持佢！
96歲“樂壇教父”榮休！許冠傑與太太約Uncle Ray慶祝
96歲“樂壇教父”Uncle Ray（Ray Cordeiro，郭利民），縱橫香港廣播界逾70載，日前宣佈因受疫情影響，5月中開始告別電台主持工作，正式榮休。歌神許冠傑（Sam）得知Uncle Ray榮休消息後，與太太相約對方出來慶祝展開人生另一頁，3人在場懷緬一番，開心得笑容滿臉，勾起了不少歲月的回憶，Sam表示感謝Uncle Ray在他歌唱生涯開始以來，一直對他支持，並將想念對方做節目時的聲音及時光。
